Izandla Eziningi Zenza umsebenzi Olula Zilethe Nethemba

Enye yezinhloso zikaHIVAN ukuxhasa ukwakheka kobudlelwane phakathi kwabantu kanye namaqembu avela emkhakheni eyehlukene ukuze izinhlelo zokusiza abahlukunyezwe ingculazi ziqale futhi ziqhubeke. Uhlelo lokunikezela ngokudla enye yalezizinhlelo. Ihlanganiselwe ngokubambisana phakathi kwabafundi nabasebenzi baseNyuvesi yaseNatal, iCampus HIV/AIDS Support Unit, iSinikithemba esesibhedlela iMcCord, okuyiqembu labantu abaphila negciwane lengculazi, kanye nemindeni yabahlukunyezwe ingculazi.

Loluhlelo laqalwa ngumfundi obenza unyaka wesithathu emkhakheni wezifundo eziphathelene negqondo yomuntu eNyuvesi YaseNatali eThekwini, okuyingxenye yokuthi bahambe bayosebenza emphakathini ukusekela abakufundile eNyuvesi, owahlangana nowayenegciwane lencgulazi ebulawa indlala ekhaya. Lomfundi kwamhlupha kakhulu ukuhlupheka kwalomama wabe eseyocela isaluleko kuthisha wakhe uKerry Frizelle ukuba ambonise ngokuthi bangamusiza kanjani lomama.

UKerry ubeke kanje: "Nami ngabuzwa ubuhlungu obabuziwa umfundi wami nesifiso sakhe sokuthi asize umama ngokuthi amuphe ukudla. Inhloso yalesisifundo ukuthi abafundi bakwazi ukusiza emphakathini ngaphandle kokuthi umphakathi uncike kakhulu kubona, ibe futhi enye inhloso ukuthi basize ngazozonke izindlela, kubekhona izinyathelo abazithathayo futhi benze nomehluko."

UKerry wayinikezela kubafundi lenkinga ukuthi bayixazulule. Bonke bavumelana ngokuthi ukudlulisela lenkinga kumnyango wezenhlalakahle akusiyo impendulo. Isimo sabanzima kubafundi, kwaze kwaqhamuka umfundi necebo lokuthi baqale uhlelo lokuphisana ngokudla lapho abasebenzi baseNyuvesi benganikela ngemali engu R50 engasetshenziswa ekuthengeni ukudla kwemindeni ehlukunyezwe ingculazi." uKerry uthi, "Ngathintana noHIVAN ngalesisicelo, base beqala basebenzisana noSinikithemba esibhedlela iMcCord abasebeqalile ukwenza umsebenzi onjengalona kodwa besadinga olunye usizo."

Loluhlelo selusebenza ngokuphelele manje, kangangoba ngenkathi kubhalwa loludaba besekunikelwe ngokudla okwanele amaphakethe angamashumi amathathu anela imindeni engu 30 ngenyanga. Lokukudla kuthengwa ngemali enikelwe abasebenzi edonswa emiholweni yabo njalo ngenyanga. UDudu Zondi, ongumxhumanisi wezinhlelo zomphakathi, uyena othenga lokhukudla. Lapha esikhungweni esibhekene nezidingo zengculazi ( Campus HIV/AIDS Support Unit), ubhekelela iqembu labafundi okuyibona abapakisha ukudla bese bekuhambisa eSinikithemba.

Ukudla kuthengwa ngesaphulelo kwa-Knowles Spar, kanti amaphepha okupakisha ukudla axhaswe uSappi kanye noNampak. Amaphakethe aqukethe ukudla okubalulekile njengempuphu, ubhontshisi, isitambu, ushukela, isobho kanye nephalishi lamabele. Ugaligi uzofakwa maduzane ngenxa yemisebenzi yawo yokulapha.

"Abafundi bakebachitha isikhathi nemindeni nakweminye imihlangano yaseSinikithemba kanye ngesonto eholwa uSonhlalakahle uMaud Mthembu", kuchaza uDudu Zondi. "Kuyabasiza abafundi kanye nayo imindeni ekwandiseni ulwazi ngengculazi. Isibonelo ukuthi, emhlanganweni osanda kuba khona bafunda kabanzi ngama microbisides nokuthi abanika kanjani abantu besifazane amandla okuzinvikela".

Omunye wamalunga omndeni aphila nengculazi uthi, "Ukuphumela obala ngokuphila nengculazi kungenze ngikhululeke ngoba ukufihla kungenza ngigule." "Lokukuhlangana nabanye kuyasiza kakhulu, nako ukudla futhi."

Uhlelo lukhombisa izimpawu zokukhula iminikelo evela kubasebenzi ikhula zinyanga zonke, kanti maduzane, UDudu uthi, imindeni eyamashumi amahlanu ingakuthola ukudla. Oyedwa wabafundi uthembise ukufundisa amalunga eSinikithemba izifundo ze-Computer kanti futhi amalunga angu 27 abhalisele uhlelo lokufunda ngezindlela zokuphila kahle negciwane lengculazi, elizokwenzelwa khona eSinikithemba.

Imininingwane mayelana naloluhlelo, xhumana:
noMadudu Zondi ku (031) 260 2132 (ucingo) noma(031) 2602397(Fax)
Email: [email protected]

<